Le site de Jean Ganiayre

« tribolatz, legeires ! »

30 août 2010 | L'occitan | 2 commentaires

Granda novela per los legeires occitanistas ! Lo darrier Ganhaire es surtit ! Las tòrnas de Giraudon son lo numero 190 dins la colleccion « Crimis » de l’ IEO edicions.
A Maraval, pita vila maitot tranquila, lo comissari Darnaudguilhem e sos quatre inspectors velhen sus la tranquilitat de la populacion (cf. Sorne Tralutz, crimis, n°162). Lo còrs d’un vielh òme es decrubert dins los vergiers obriers a la riba de Fonladosa. Coma saber que queu murtre es en relacion emb la decruberta de l’esqueleta d’una femna dins la fòssa comuna ente son rebonduts los còrs de set sodards alemands tuats per lo maquis veiqui seissante ans. E pas lonh d’aqui, un ancian orfanelat sembla rescondre ben daus misteris… Pas aisat, d’autant que quo es la gendarmaria locala que es en charja de l’afar… Faudra tota l’obstinacion e lo nas dau Bastard e de son equipa per deboirar lo fiau de l’afar que monta a las oras negras de l’ocupacion. Misteri, rebombaments, faussas dralhas manquen pas dins queu roman que ten lo legeire deslenat… (Quo es io que zo dise…)

Las tòrnas de Giraudon, IEO edicions, 13 euros 50, en venda a Brantòsme, a la librariá Pòrta-Lanard, rua Gambetta, o a Novelum, Seccion Perigòrda de l’ Institut d’ Estudis Occitans, Centre Socio-Culturau, 95 rota de Bordeu, 24430, Marsac d’Eila. Tel : 05.53.08.76.50, ieo24@ieo-oc.org

Quo era plan bon, per mon arma !

1 juin 2010 | L'occitan | Aucun commentaire

Los que eran a Varanha au mes d’abriu an pas perdut lor temps. Quo era coma a l’escòla, eran sietats sus daus bancs en faciá daus regents. N’i en ‘viá dos de regents, e te clafissián pas la cruca de reglas de tres o d’istòria de França. Odeta Marcilhaud e Glaudi Coderc sont diplomats en liquossianas e son passats redde aus trabalhs pratics : te boiran quòqui, te trolhen quòlai, te zo fan bonhar, un pauc de sucre, dau vin, pas mau d’aiga de vita, dos tres mes de pacienciá, e quo es preste. De la pacienciá, los elevas ne’n’vián gaire, mas urosadament que los professors avián portat de que far gostar e aus clapetaments de lenga e lechotaments de bochas, fau creire que quo era rudament bon. Anetz, som pas entau ! Per vos desconsolar de pas èsser estat a Varagna, veiqui doas receptas de sason :

Lo vin de boisson negre, dich vin d’espina :

• Cinc litres de bon vin
• Dos quilòs de jitòlas de boisson negre
• Far bonhar tres jorns dins lo vin (pas mai que lo vin virariá)
• Ajostar 1 quilò de sucre e un litre d’aiga de vita
• Filtrar….

Lo vin de cacaus :

• Massar quinze cacaus lo jorn de la Sent Joan ( fau que los tests sián enquera mofles..)
• Las esbolhar
• Un litre d’aiga de vita
• Cinc litres de vin roge
• Far bonhar un mes (quo es long, un mes !)
• Filtrar
• Apondre 100 g de sucre per litre

E ben aurà, au trabalh, me’n diretz de las novelas…

Son fòus, fau creire !

23 mai 2010 | L'occitan | Aucun commentaire

Ilhs ‘vián suat sus Soletat, La Chamineia, La pòrta dau Reirlutz, molhat la chamisa sus Las Cronicas de Vent-Li-Bufa, s’eran donat un mau de chen sus Dau Vent dins las Plumas e Las Islas jos lo Sang, avián maleviat sus Lo Darrier daus Lobaterras, e sufert las peiras sus Lo Viatge Aquitan… E ben quo era pas pro, quilhs falords volián de mai rencontrar l’autor… Eran plan ‘na pita trentena, per la majer part elevas dau cors d’occitan de Micheu Nicolas a Charraç, queu pitit conh de Charenta Occitana, conegut per sa dictada dau mes de janvier (veire sus queu site ) mas tanben quauques uns de l’Associacion Camille Chabaneu. Quo es a l’auberja de Autafaia que me sei donc transportat coma tres quatre fideles per afrontar queu public que a priori, deviá pas èsser tròp ostile. Mas un sap jamai… Me sovene de queu salon dau libre ente un jòune òme m’aviá bombat dessus, un pauc esmanciaire : quo es vos Ganhaire ? Una espiada negra, puei era tornat partit sens ren dire de mai. Rensenhament près, lo paubre aviá pas tròp aimat l’annada passada a trabalhar lo Libre dau Reirlutz per lo bachelierat. Mas queu ser lai a Autafaia, nonmas dau monde bien aimable, que demai, sabián legir e bien legir, a creire que mos libres son pas tan torsuts que quò…

Ai pogut parlar liurament de ma « passion d’escriure », quo era lo tema de la serenada, titre bien chausit si passion vòu totjorn dire sufrença. Parlar tanben de ma rencontra coma la lenga e la descruberta de mon identitat occitana, contemporana de mon besonh d’escriure, puei de la trapela que se barra quante l’enviá remplaça lo besonh… Doas oras de discutida, d’eschamje, de questionament sens totjorn de responsa, e nonmas quauques badalhaments… E per ‘chabar un sopar ente la moleta de mossairon a-d-ela tota sola valiá lo desplaçament !

Joan Ganhaire a quand même écrit quelques trucs :

1977 : Lo Libre dau Reirlutz, recueil de nouvelles, premi Pau Froment, traduit en 2001 par Jean Sibile, édité chez Federop sous le titre Portes de l’Ombre, prix de la Bordelaise de Lunetterie !
1984 : Lo darrier daus Lobaterras, roman médiéval.
1992 : Dau vent dins las Plumas, roman de cape et d’épée, premi Joan Bodon 1994
2000 : Lo Viatge Aquitan, recueil de nouvelles, premi Jaufre Rudel 2001. La nouvelle titre, traduite par J.P. Blot sous le titre Aller Simple a été publiée aux éditions IN 8 en 2006
2004 : Las Islas jos lo Sang, suite de dau Vent dins las Plumas.
2006 : Sorne Trasluc, roman policier
Eté 2010 (on y est presque) : las Tòrnas de Giraudós, roman policier.
En préparation : Los Contes de la Pès Nuts, nouvelle, Perdilhòta, nouvelle, Vautres que m’Avetz Tuada (Policier).

D’ent’es vòstre curet…

9 avril 2010 | L'occitan | Aucun commentaire

Quo era la question tradicionala que l’un pausava aus vielhs que sabián pus ente eran nascuts… e tot lo monde sab que laidonc la responsa veniá sens dificultat… Quo es sus l’idada que los ancians, quitament los que son un pauc treblats, son mai d’aise dins lor lenga mairala que non pas dins un francès aprengut a l’escòla, pas totjorn d’un biais aisat, que la Region Aquitania a prengut la decision de lançar en Dordonha una formacion daus personaus de maisons de retirada e daus trabalhaires daus servicis a la maison a la lenga occitana. Perque en Dordonha ? Perque quo es lo despartament ente la lenga es enquera parlada per mai de dietz dau cent dau monde, e segurament mai demest los mai ancians. Quela iniciativa, jostenguda per lo Conselh Generau es una prumiera en França e fai mina d’experimentacion. Organisada coma l’ajuda de l’APEF (Associacion Partenaris Entrepresas e Formacion que coneis bien J.L. Leveque, president de l’ Institut d’Estudis Occitans),‘la fuguet confiada au Centre de Formacion e Promocion de Champ Savineu, que tanleu la fin de l’annada 2009 a perpausat quela formacion aus establiments e aus servicis a la maison dau grand Perigüers. Per aquò, l’es pas d’aisat botar en plaça. Los directors son pas tròp praissats de laissar partir lor personau per 70 oras de formacion sus un tema que sembla a la prumiera guinchada pas tròp seriós… Quo es per quò que Ives Marecaus, charjat de mission per las personas ajadas au Conselh Generau a lançat una invitacion aus directors de Maisons de retirada e de servicis a la maison a ‘n’amassada per lor mielhs explicar lo sujiet. La pescha fuguet melhor quete còp, e los presents fugueren convençuts dau seriós de l’afar e fagueren promessa de tornar lançar la demarcha a l’autona. Demest los presents, poguerem notar la preséncia de Frederic Woné, especialiste de las personas ajadas, president dau CLIC Cassiopea de Periguers que prend en charja la tele assistança sus tota la Dordonha e que aura es segur de l’importáncia de comunicar en lenga occitana coma sas « praticas ».

Jeremie Obispo, chargé de mission langue occitane à la Région, Julien Mouret, directeur de l' EHPAD de Thiviers, un peu caché: J.L. Lévèque, président de l'Institut des Etudes Occitanes, Stéphane Ingouf, délégué fédéral des centres sociaux, Philippe Merle, directeur de l' EHPAD de Vergt, Mme Merle

Samuel Tognarini, Frederic Woné, Alain Neuville, Jérémie Obispo, Julien Mouret, Jean Louis Lévèque

Quante tornam (o tornem) a l’escòla !

19 mars 2010 | L'occitan | Aucun commentaire

Foliá ben essèr un pauc(mai ben pro) falord, fadat, desvirat, trasfòu, bimbin, nineta, tucat de la coa de l’anhela, e ne’n oblude segurament, per se lançar queu dissabde aprep miegjorn sus las rotas eneviadas e eslampiantas de la Charenta Occitana. E tot quòqui, per que far ? Una dictada ! Urosadament, Charreç (Charras en francimand) n’es pas tròp luenh de chas nos, una o doas gulhadas de Maruelh. Mas quo ne’n valiá lo viatge ! Micheu Nicolau, grand ordonator chasca annada de queu eveniment nacionau occitan, sap reçaubre son monde, musica, marende, pitits presents per tot lo monde…Mas avant, fauguet molhar la chamisa sus un texte bien plasent par ma fe, tirat dau famós Picatau de Sent Barrancon d’Enric Delage, dich Contaviòrla. Una ciquantena de treblats tireren la lenga tres quarts d’ora, s’entraupant dins la doblas consonas, las conjugasons torsudas e los accents tonics (que compten pas coma fautas, Diu mercès…) Aquí, pas de nòtas, pas de punicions, nonmas de las recompensas per aver participat a la reviscolada de la lenga occitana. Julietta, Nadina, Francesa, e Sergi an pogut mostrar coma avián fait daus progrès mercès au cors d’occitan de Bordelha (tots los divendres au ser a 18 h, au Tricicle Enviblat, fau ben se far un pauc de pub…) e an reçaubut lors premis de las mans de M. Boutant, president dau Conselh Generau de Charenta, e de M. Jean Claude Viollet, deputat de Cofolens.

Tornaram (o …rem) endueinan, sens fauta !

President Rosset, votarem per tu !

24 février 2010 | L'occitan | Aucun commentaire

La fina flor de l’occitanisma, manca los de Bearn e de Lanas, ( per causa de nevia) era amassada a Brantôme a la damanda dau President de Region Alan Rosset. Tot lo monde sap, e si zo sabetz pas, vatz l’aprener, que lo plan conegut Marçau Peironin es sus la lista daus candidats a las eleccions regionalas que se van desbanar en març (mas quòqui zo sabetz segur…) Veiqui donc perque lo canton de Brantôme era queu jorn lai lo centre d’ Aquitania (mas zo sabiam desjà…) Artistas, ensenhaires, presidents d’associacions agueren entau l’occasion (« escasença » es mai sabent) de far coneitre au president lo trabalh que fan a tots niveus per la lenga occitana. Quo es segur los ensenhaires que an lo mai meschant trabalh a se tustar tant que tant au rochier de l’Educacion Nacionala. De queu costat, una sola bona novela : lo rector d’ Aquitania es pus quí…Lo noveu pòt pas ésser pieg, e lo President Rosset a l’intencion de li parlar rapidament dau país. Trabalh de colecta, socialisacion de la lenga ,ensenhament en defòra de l’educacion nacionala fugueren tanben botats sus la taula, ente demorava un pauc de plaça a costat de la sopa, de l’assieta de riton e dau salmi d’aucha. Cresem que degun pòt botar en dobte la vertadiera bona volontat dau President per çò que de la presa en compte de la cultura occitana. Òc, President, votarem per tu, e tots los que te seguen, z’as plan afanat !

Benoit Secrestat, premier secrétaire fédéral du PS, Jean Paul Verdier, chanteur, animateur radio, Laurent Labadie, comédien, Michel Queyroy, trufficulteur, Philippe Burey, président d'une association culturelle dans le canton de Vergt (et pépiniériste...)		M.Puyrigaud, occitaniste, représentant le PNR Périgord-Limousin, Martial, Michel Samouillan, majoral du Felibrige, Claude Dubuisson, de l' Auberge de Faye, à Brantôme, (une adresse à retenir!)
Eric Astier, président de la Fédération des enseignants de langue occitane, Denis Chadeuil, président des étudiants occitanistes de Bordeaux III		J.L. Lévèque, président de l'Institut d' Etudes Occitanes de Dordogne (Novelum), Bernadette Fournier, du Lot et Garonne, présidente de la commission enseignement de l' Amassada, et re-Eric Astier...

Un pitit pauc avant, quo era lo président dau gropament regionau daus truficultors d’ Aquitania, Micheu Queyroi, que veniá rencontrar lo gropament Brantosme-Maruelh e jostener los candidats de Dordonha a las regionalas. Lo president Rosset, retengut a Nuòvic, ‘ribet tròp tard per rencontrar tot queu brave monde.

lo defunt CPLO.

28 novembre 2009 | L'occitan | Aucun commentaire

I a quauques mes, quo es l’ ADAM 24 que nos ‘viam portat en terra. Lo 20 d’octobre, quo es lo CPLO que l’a seguida dins la tomba. Mas coma per la musica quel enterrament era simbolic, que lo CPLO era desà tornat viu jos la fòrma dau pòle Patrimoni-Occitan de l’ Agença Culturala Departamentala.

Lo Comitat Perigòrd per le lenga Occitana era nascut en 1985, a l’iniciativa de … Roland Dumas, laidonc ministre daus Afars Estrangiers. E la prumiera dotacion que tombet dins lo breç de l’associacion nonmas nascuda veniá de son ministeri… Tot un programme ! L’ estachament dau ministre per la Dordonha e especialament per lo sarladès e son amistat coma lo Majorau Monestier, laidonc president dau Bornat fagueren de eu un pairin de prumiera !Estranja ceremonia que la que portet lo CPLO sus la font benestiera… Prefet, inspector d’academia, quite prefet de region e rector eran quí, au gardatz-vautres, escotant lor ministre parlar d’occitania, de lenga, de cultura.Quauques uns demest nautres, cregueren veire lo solelh se levar. D’autres, mai clarvesents, i vegueren nonmas una embelida passagiera. Los ministeris passan, la Republica demòra, drecha dins sa bòtas, e queu genre de plasentariá es pas de las que li agraden. Urosadament, lo despartament prenguet la releva e lo nenet poguet contunhar de viure, de vivotejar. Una de las condicions de l’existéncia dau CPLO era l’amassada, per lo mens lo trabalh en comun de las doas fòrças vivas de l’occitanisme en Dordonha, a saber lo Bornat e l’Institut d’ Estudis Occitan, que s’espiavan un pauc de bingois, per pas dire mai… Sus queu punt, la creacion dau CPLO fuguet ‘na reussida. Aprenguerem a nos mielhs coneitre, a trabalhar ensemble e quilhs 25 ans fugueren una epòca fasta per la vita occitana de nòstre despartament. Coma dins los cobles, i aguet daus moments malaisats, mas que fugueren surmontats. La vita era pas aisada, fau ben zo dire, emb un pitit budget e daus besonhs de mai en mai grands, e l’abséncia d’accions d’importància e de lisibilitat manqueren far s’abolir l’associacion.Puei, en 2004-2005, lo despartament decidet de çò que es pas enquera tot a fet una politica culturala occitan, mas que comença d’i semblar tot plen. La prumiera accion fuguet l’ajuda a la colecta de la Mémòria Occitana en Perigòrd Verd, que donet au pitit CPLO l’ocasion de montrar tota sa vigor e son militantisme. Quo es au pus près a questa epoca que fuguet decidada la creacion de l’Agéncia Culturala Despertamentala. Lo CPLO, un moment espaurit de desapareisser en se boirar a las prestigiosas ADAM24 e ADDC, sautet finalament dins lo tren man dins la man coma la pita Memòria Viva. Dotat de mejans suplementaris en personau, lo Pòle Occitania-Patrimòni es conegut aurà per son trabalh de qualitat e son ròtle de quasi-entrainaire de l’ Agéncia.

La darriera amassada extraordinària que prononciet solanelament la dissolucion dau CPLO decidet taben de mantener los liams entre I.E.O e Bornat que son pus talament lisibles dins la novela organisacion.

à gauche, Sebastian Girard, Juliette Rouillon Durup, à droite: Daniel Belle Wangue, expert comptable, Jaume Surpas, Micheu Samolhan, Monica Burg		au tout premier plan, Francès Pontalier.

lo viatge a Daglan.

14 novembre 2009 | L'occitan | Aucun commentaire

Tan que ne’n sei a parlar de mos viatges, vau vos parlar de lo que faguí i a gaire a Daglan. A quo es pas la Ongria, nimai la Creusa… sab pas si sabetz ente quo es, Daglan, mas si zo sabetz pas, vos conselhe de vos rensenhar e d’i anar far una virada, subretot si quo es coma io per un brave jorn de septembre. Ai donc laissat la valada de Drona, fau ben se chamjar las ideias de temps en temps. Perigüers, segur, puei la rota de Briva, Bolasac, Las Versanas, a drecha sus Sarlat, Al Buga, Las Aisiàs de Taiac. E quo es justament sus la Aisiàs qu ai virat aprep La Dosa. Un pitit bonjorn a nòstre grand-pair, lo vielh Òme dau Cròs-Minhon, que es totjorn pincat sus son bauç, la testa un pauc dins las espanlas, vire a drecha sus Campanha, ente lo chasteu que l’ Estat a generosament donat au Departament vai servir d’acuelh au Pòle Internacionau de Preïstòria, riebe a Sent Cibran, aquí quo es la valada de Dordonha, segue la Granda Aiga jurcinc’a Bainac e Casenac. A mon amic, lo brave « castel » com disen aicí,benleu pas si brave que lo de Bordelha, queraque, mas fotrament bien plaçat, que de lassus se veu un brave tròc de país, passe Dordonha, riebe a Castelnaut, enquera un fiarot queuqui, mai que se fasián la guerra coma l’autre d’en faciá, contunhe riba gaucha, passe Sent Cibranet, ente ai legit dempuei que tot un pilòt de bestiòlas avián recentament prengut la fugida, e me veiqui a Daglan ,brave pitit borg de peira rossa conegut per sas chabanas de lausas e sa familha Fijac.

Fijac, lo pair		Fijac, lo filh

Quo es justament ilhs que ne’n son l’encausa si ai fait lo viatge. Fijac pair, defensaire de la lenga, autor de « La Lenga en Boiga » estudi sus lo parlar de Daglan, Fijac filh, regent de classa bilinga a Caurs (quo es pas tan lonh que quò de Daglan) e poeta, autor entre autres de « La Fabrica de Petaç, tots dos se son eimajats d’amassar un còp per an los escrivaires occitans e lors legeires.

Micheu Chapduelh		Bernat Lesfargas

Quo es per quò, en ‘ribar podiá tombar nas dins nas coma Micheu Chapduelh, Bernat Lesfargas, que se presenten pus, Joan Claudi Dugròs, reviraire de Eugene Le Roy e de Claudi Senhòla, Brigita Oraziò-Miramont, poetessa, mai d’un còp botada en musica per Iannic Guedec (un daus dos musicaire de Ongrïa…) e lo famós Joan Pau Verdier, e de segur los Fijac pair e filh.

Joan Claudi Dugròs		Brigita Oraziò-Miramont

L’aprep miegjorn se passa dins un ambiant amistós, ente la lenga d’òc viu per de bon dins sos dos parlars perigòrds. Los escrivaires son quí, los legeires un pauc mens… Mas i a un dicton dins lo mitan literari occitan, que dich que i a mai d’autors que de legeires…. A Daglan, queu jorn lai quo era presque lo cas. Mas nos en fotem. Avem passat un bon moment dins un conh de Perigòrd miraudiós….

Joan Pau Verdier		Olivier Pijasson e Laurenç Aupi

La toristalha

5 septembre 2009 | L'occitan | Aucun commentaire

Toristalha : mot occitan qu’on ne trouve dans aucun dictionnaire. Néologisme inventé par l’esprit fécond de Martial Peyrouny mot à la fois amical et vaguement dépréciatif. Ne pas confondre avec torista, qui vous a de douloureux et nauséabonds relents de maladie. Non, la Toristalha n’est pas une maladie. C’est au contraire le symbole d’une vitalité croissant d’année en année. Cette fête traditionnellement calée le dernier week-end (en occitan dimenjada) d’ Août est un salut à la grande migration qui remporte ce jour là tous nos amis estivants, vacanciers et touristes vers des cieux moins cléments. Tel le refrain de Carnaval, « Adiu, paubre Carnaval, tu te’n vas e io demòre », la Toristalha célèbre le retour à un « entre-nous » égoïste et délicieux.

Un entre-nous où langue et musique occupent bien entendu une place de premier choix. Odette Marcilhaud , sortie de sa Coquille natale pour nous livrer les célèbres histoires de Félicie Brouillet, remises par ses soins au goût du jour, connaît toujours son petit succès. Et Jean Paul Verdier, ami et complice de Martial dans l’émission Meitat Chen, Meitat Pòrc a rempli l’après midi ensoleillé de ses créations et des adaptations occitanes de Léo Ferré et de Georges Brassens.

Une seule ombre au tableau : la fin de la soirée a été sifflée à 23h 30, à la demande d’une population âgée et grincheuse qui trouve que de la musique une fois par an c’est déjà beaucoup trop, même si c’est celle bien sage de Du Bartas. Les Pelharauds ( les Chiffonniers), cette bande de jeunes qui porte, entre autres, cette manifestation ont d’ailleurs fait part de leurs sentiments dans une interview (entrevista, entrevuda) un peu saignante dans l’ Echo du Centre du 31 août.

Mais tout le monde le sait : trois vieux sur un banc, c’est charmant, trois jeunes sur un banc, c’est suspect.

Los terroristas

16 août 2009 | L'occitan | Aucun commentaire

Le petit texte qui suit est facile à lire pour les occitanophones initiés, et pas trop compliqué pour ceux qui voudront se donner la peine de le déchiffrer. Un devoir de vacances, en somme… (Il n’y aura pas de traduction, vous comprendrez pourquoi en lisant le texte!)

Quo es lo president se mesme en persona que venguet l’anonciar a la television. La democracia era sauvada, lo país podiá bufar liurament. Quo i era. La magnifica polícia de nòstre brave país aviá fait son trabalh. Los terroristas eran estats ‘restats la velha au ser, dins lor maison daus barris de Gueret. Tres òmes e doas femnas. Los tipes eran dau genre barbuts, piaus frisats mau penchenats, pitas lunetas cercladas de fer. De vertadieras charas d’anarchistas. Las femnas, piaus longs, tetons liures jos la chamisas a penas botonadas eran lo quite eimatge dau laissat –‘nar e d’una moralitat leugiera. Lo genre a mielhs tener sus l’eschina qu’una chabra sus las banas. Mas per los policiers, lo mai triste era estat la decruberta de tres goiassots que comprenian quitament pas çò qu’un lor disiá e respondián nonmas dins una lenga que lo comandò connaissia pas. S’eran laissats prener sens resisténcia. Semblavan gaire dangeirós e quauquas votz s’eran desjà levadas per dire que avián jamai tuat degun. Quo era vrai, mas devián segurament i pensar e las armas que eran pas enquera estadas trobadas eran plan clachadas en quauque luòc. Per l’ora avián nonmas escrich sus los murs, crubert lo país de tractes, editat un pitit jornau,urosadament dins quela lenga que qua’iment degun mai compreniá. Mas sabetz coma quo es, queu monde tròba totjorn quauques meschants ciutadans per prener lor defensa e trobar que fin finala la lucha que menen es justa e vau la pena d’estre ajudada. Mas quilhs cinc lai farián pus de mau. Chabarián lor vita en gabia e los dròlles confiats a l’assisténcia tardarián pas a tornar parlar normalament. Mas la democracia es la democracia e tot quò se fariá pas sens un procès juste. Mas, aquí, i auriá segur una pita complicacion. Per lor defensa, faudriá trobar dau monde que coneisse enquera un pauc de quela lenga, que quilhs fotuts penlants volián parlar nonmas francès.